TÓDOLOS QUE PRERESERVARON ENTRADA PARA O DEPOR-LANGREO PODERÁN PRESENCIAR O ENCONTRO EN DIRETO EN RIAZOR.

 

Segundo adiantou vía Twitter o RC Deportivo, ao haber algo menos de 5.000 peticións, tódolos que solicitaron a entrada poderán acceder ao Estadio de Riazor para presenciar o encontro en direto ante o Langreo o Domingo 2 de Maio a partires das 19:00 horas, (17:00 GMT).

As 5.000 localidades distribuiranse entre as 8 bancadas do Estadio ABANCA-RIAZOR, que abrirá todos os puntos de acceso dispoñibles en Tribuna, Preferencia e os fondos de Marathón e Pavillón. Unha vez pechado o prazo de pre-reserva asignaranse as entradas en correspondencia coa bancada da que son abonados. No caso de que se complete a bancada que corresponde co seu abono, asignaráselles unha localidade nunha bancada de igual ou superior categoría. Os prezos das entradas son de 4 euros os fondos e 6 euros as bancadas laterais.

Excepto no primeiro partido, esta temporada a demanda nunca alcanzara, para ningún dos demais encontros, as dúas mil solicitudes expresas de asistencia. Por iso, para este partido e dado que se tiña a esperanza de que a Xunta de Galicia aceptase a solicitude realizada, abriuse a posibilidade de que calquera Socio puidese solicitar unha entrada, aínda que respectando sempre a prioridade do Socio Protector para a asignación de localidades. Unha vez finalizado o prazo de solicitudes, todos os Socios que pediron unha localidade obtiveron a mesma posto que foron algo menos de cinco mil as solicitudes rexistradas até hoxe ás 14:00 h.

Nas próximas horas notificarase vía correo electrónico a todos os adxudicatarios a posibilidade de adquirir unha entrada así como o desenvolvemento do proceso de compra, 100% telemático grazas, unha vez máis, á utilización da tecnoloxía da empresa Cluber integrada por Duacode nos nosos sistemas.

No momento da compra da entrada, asignaranse os datos de bancada, porta de acceso, fila e asento a cada Socio adxudicatario, responsable desde ese momento do uso posterior desa entrada en caso de rastrexo por COVID-19.

Unha vez comprada a entrada, para acceder ao Estadio ABANCA-RIAZOR será necesario presentala en formato dixital (na pantalla do dispositivo móbil) ou impresa (sen dobrar o espazo do código QR), non sendo válido ningún carné para o acceso. Por protocolo COVID cada asistente deberá pasar un control de temperatura, hixienizar as súas mans, portar máscara en todo momento, sentar obrigatoriamente na localidade asignada na súa entrada (estará identificada cun adhesivo verde de ASENTO DISPOÑIBLE) e permanecer na devandita localidade sentado até finalizar o partido (unicamente permítense desprazamentos aos baños. Non haberá servizo de bares nin está permitido introducir e consumir alimentos no interior do Estadio), respectando a distancia de seguridade de 1,5 metros entre espectadores en todo momento. Do mesmo xeito, na saída das instalacións, hai que respectar esas distancias, atendendo ás indicacións do persoal do Club asignado a cada bancada do Estadio e ás que se vaian dando a través da megafonía e os videomarcadores de ABANCA-RIAZOR.

O Real Club Deportivo reitera o agradecemento previo a todos os seus Socios polo cumprimento desta normativa, fundamental para poder obter a futuro autorizacións como a desta fin de semana.

-Foto : RC Deportivo

-Texto : piratasdemuxia


Attachment

Utilizamos cookies propias e de terceiros para o correcto funcionamiento da web. Se continúa navegando, acepta o seu uso.

ACEPTAR
Aviso de cookies