Terceiro encontro de pretempada do Deportivo : vitoria no Memorial Miguel Ángel

Parreño xogou todo o encontro.

Ourense CF 0-2 Depor

O Deportivo acadou a súa terceira vitoria nesta pretempada ao imporse por 0-2 ao Ourense CF no Estadio O Couto, nun partido correspondente ao Memorial Miguel Ángel. O choque foi pouco vistoso, cun ritmo lento e escasas ocasións, marcado pola calor (30ºC en Ourense) e polo escaso ritmo competitivo propio destas alturas de tempada.

Os branquiazuis, cun once inicial cheo de xogadores que buscan minutos, apenas xeraron ocasións, pero foron efectivos: marcaron nas dúas chegadas claras que tiveron. Pola súa banda, o Ourense, de categoría inferior, só probou a porta unha vez, cun cabezazo frouxo tras un córner que atrapou sen problemas Parreño, que debutaba e xogou todo o encontro. Todo apunta a que Helton Leite será o gardameta titular o vindeiro mércores en Inglaterra, ante o Watford (20:45 hora galega/19:45 GMT), nun encontro que se poderá ver pola canle de YouTube do RC Deportivo.

Primeira metade: pouca historia, pero efectividade

No minuto 38 chegou o primeiro gol, tras un córner sacado por Escudero ao segundo pau, onde apareceu Chouri para adiantarse á defensa e marcar de cabeza. Pouco máis deixou a primeira parte, marcada pola calor e o ritmo pausado.

Segunda metade: trocos e sentenza de Yeremay

Ao descanso producíronse os primeiros cambios: Petxaroman entrou por Samu e Teddy Alloh por Escudero. Non foi ata o minuto 61 cando chegou o carrusel de substitucións, incluíndo o debut de Arnau Comas , (que se enfrontou ao seu irmán, xogador do Ourense), e tamén de Martín Ochoa. No 71 entrou Damián por Dani Barcia.

O xogo seguiu na mesma liña ata que Yeremay rompeu a monotonía cunha gran acción: controlou un pase en longo de Patiño, regateou ao seu defensor e marcou cun tiro cruzado, raso e seco, ao segundo pau no minuto 88.

O Ourense tratou de evitar un novo correctivo como o sufrido polo Compostela na anterior semana (5-0), e mantivo o tipo ante un Deportivo non encaixou nos dous encontros desta semana.

Aliñación do Deportivo:

Titulares: Parreño; Germán, Noubi, Samu, Dani Barcia, Escudero, Rubén López, Villares, Mella, Soriano, Cristian Herrera, e Chouri.

Trocos:

• Min 46: Petxaroman por Samu, Teddy Alloh por Escudero

• Min 61: Arnau Comas por Noubi, Patiño por Rubén López, Genreau por Villares, Luismi Cruz por Mella, Yeremay por Soriano, Diego Gómez por Cristian Herrera, Martín Ochoa por Chouri

• Min 71: Damián por Dani Barcia

Goles: 0-1, min 38: Chouri; 0-2, min 88: Yeremay.

Descanso Dominical

O Dépor adestrarase de novo mañán luns 28 de xullo a partires das 17:00 horas en Abegondo.

-Fotos : RC Deportivo

-Texto : Xosé Búa “Pirata”