O neerlandés Teun Gijselhart, primeiro fichaxe do RC Deportivo para a tempada 2026/27, compareceu por vez primeira ante os medios de comunicación como futbolista branquiazul. O centrocampista deixou unha gran impresión non só polas súas palabras, senón tamén polo seu sorprendente dominio do castelán, unha lingua que leva anos preparando coa intención de cumprir un soño: xogar ao fútbol en España.
“É un pouco gracioso, porque a miña nai viviu e estudou en Salamanca durante un tempo. Grazas a ela tiven o primeiro contacto co idioma. Empecei a aprendelo porque sempre tiven na cabeza que algún día me gustaría xogar ao fútbol en España. E aquí estou”, explicou o xogador durante a súa presentación.
Gijselhart confesou sentirse moi cómodo nos seus primeiros días na Coruña e agradeceu a acollida recibida por parte do vestiario e do corpo técnico.
“Desde o primeiro día sentinme moi ben, estou orgulloso de estar aquí. A primeira semana de adestramentos foi moi boa e positiva. Grazas aos meus compañeiros e ao corpo técnico, recibíronme moi ben. Síntome cómodo, pouco a pouco”, sinalou.
Sobre o seu estilo de xogo, o novo centrocampista deportivista definiuse como un futbolista comprometido co traballo colectivo e disposto a axudar tanto en defensa como na creación.
“Quero aportar intensidade, recuperar balóns e participar na construción do xogo”, destacou.
Un dos aspectos que máis pesou na súa decisión de fichar polo Deportivo foi o proxecto deportivo da entidade branquiazul. O neerlandés mostrouse ilusionado coa oportunidade de formar parte dun equipo que regresa á máxima categoría do fútbol español.
“O proxecto é moi bo, con xogadores novos e de futuro como Mario Soriano. Todos se senten cómodos co balón. Este é un gran club cunha gran historia. Estou listo para dalo todo por este club”, afirmou.
Ademais, deixou claro que chega coa intención de seguir evolucionando tanto dentro como fóra do terreo de xogo.
“Quero aprender e seguir mellorando. Non só como xogador, senón tamén como persoa”, asegurou.
Nas súas primeiras xornadas como deportivista xa recibiu un novo alcume no vestiario. Os seus compañeiros comezaron a chamalo “Toni”, un detalle que evidencia a rápida integración do futbolista no grupo.
O centrocampista neerlandés chega para reforzar a medular deportivista, podendo actuar tanto como pivote defensivo como en posicións máis adiantadas no centro do campo, aportando calidade técnica, intensidade e capacidade física a unha zona clave para o equipo.
Para escoitar todas as súas declaracións na súa primeira comparecencia ante a afección deportivista, podes ver o vídeo completo que acompaña esta información.
–
-Foto e texto : Xosé Búa “Pirata”
-Vídeo : RC Deportivo
–
