ROLDA DE PRENSA DE JORGE VALÍN : “OS CANTEIRÁNS TEMOS QUE TRATAR DE CONSOLIDARNOS NO PRIMEIRO EQUIPO”.

 

Pasou por rolda de prensa Jorge Valín que falou do que lle ven enriba ca lesión de Eneko Bóveda que representa unha grande oportunidade se Fernando Vázquez ten a ben darlle a titularidade.

 

O canteirán cre que o cambio de superficie, da herba natural á sintética do Estadio Reina Sofía do Unionistas de Salamanca CF, “afectará porque ao final é un cambio de superficie importante. Tamén é verdade que o campo de alí é de última xeración, co cal dentro da diferenza que pode haber, notarase menos”.

Opina que “estes adestramentos (no campo do Monte) véñennos ben para facernos máis ao terreo. Espero que o afrontemos sen ningún problema”.

Asume con naturalidade unha semana na que podería entrar no once inicial pola lesión de Eneko Bóveda: “Este ano son xogador do primeiro cadro e se estou aquí é porque podo achegar cando o míster o crea conveniente. Agora tivemos a mala fortuna de que tanto Salva como Eneko caeron o outro día lesionados. Se me toca xogar a fin de semana trataremos de facelo o mellor posible. Creo que estou preparado para iso”.

É consciente que afronta a nivel individual “un ano difícil. Hai moito nivel neste cadro pero con ganas de tratar de achegar o máximo e ter o máximo número de minutos posible”.

Espera este domingo 1 de novembro en Salamanca (16:00 horas, Footters) “un partido complicado. Están máis feitos ao campo. Son un equipo bo. Gañaron ao Compostela na 1ª xornada e empataron en Pontevedra na 2ª. Teñen 4 puntos como nós. Eles tamén van querer os 3 puntos e sairán a por todas, presionando arriba mesmo. Estamos preparados para esa intensidade que van propoñer e nós temos que igualala ou superala para gañar o partido”.

Ve ao Dépor listo para visitar ao Unionistas aínda que admite que “temos que facernos aos botes, a como roda o balón neste terreo. O equipo está a adaptarse ben”.

Tamén recoñece que nos 2 partidos xogados até a data “non estivemos do todo cómodos. O Compostela saltábanos bastante ben a presión e non fomos capaces de ter longas posesións, de ter confianza con balón, de ter o balón no seu campo. Ao final levamos 2 xornadas, 4 puntos. Dentro do que cabe está ben. Sabemos a esixencia que hai e agora a polos seguintes partidos coa maior esixencia pero con tranquilidade de saber que isto está a empezar e de que temos bastante marxe de mellora”.

-Foto e Texto : piratasdemuxia

-Vídeo e Txto : RC Deportivo