Antonio Hidalgo compareceu este venres na sala de prensa do Dépor Training Center para analizar o próximo compromiso ligueiro do Deportivo. O técnico coruñés insistiu en que a Segunda División é unha competición “extremadamente apertada”, onde “a diferenza de puntos, tanto pola parte alta como pola baixa, é mínima”.
“Estamos a falar de tres ou catro puntos entre os equipos de arriba, e tampouco hai moito máis entre os de abaixo. Hai moitos xogadores con experiencia nesta categoría, e iso fai que todo se iguale. Nesta liga todo se decide por detalles, pola concentración e pola capacidade de competir cada minuto”, advertiu Hidalgo, quen destacou a importancia de manter “o nivel de sufrimento e esixencia” en cada partido.
O adestrador branquiazul tamén se referiu ao Málaga CF, rival deste domingo 12 de outubro (21:00 horas, La Rosaleda, LaLiga TV Hypermotion e Fútbol 2). Hidalgo, que defendeu as cores do conxunto andaluz durante tres tempadas, recoñeceu que coñece ben o contexto no que se atopará o Dépor.
“Estiven tres anos alí e sei perfectamente o que transmite o estadio. La Rosaleda empuxa moitísimo, especialmente cando o equipo precisa resultados. Están nun momento de necesidade e iso vai facer que a afección se volque. Ademais, teñen un gran adestrador, que leva tempo facendo un traballo sólido, apostando pola xente da casa e dándolle personalidade ao equipo”, explicou.
Con todo, Hidalgo amosouse confiado nas posibilidades do Deportivo: “Temos un plan de partido claro e imos executalo, esteamos onde esteamos. Eles van saír moi fortes desde o primeiro minuto, con intensidade e presión, pero nós tamén queremos ir a por a vitoria desde o inicio”.
O técnico prevé “un encontro moi equilibrado, de moita loita e intensidade”, no que o máis mínimo erro pode marcar o resultado final. “Será un deses partidos que representan perfectamente o que é esta categoría: moita igualdade, moita batalla e a obriga de estar concentrados ao mil por mil”, concluíu.
-Foto e vídeo : RC Deportivo
-Texto : Xosé Búa “Pirata”