Antonio Hidalgo: “Temos que volver a ter solidez e ser máis determinantes”
O adestrador do Deportivo, Antonio Hidalgo, compareceu este venres en rolda de prensa no Dépor Training Center de Abegondo, na previa do encontro que o conxunto branquiazul disputará mañá en Riazor ante a Cultural Leonesa (18:30 horas / 16:30 GMT). Durante case vinte minutos, o técnico repasou a actualidade do equipo, o estado dos seus xogadores e as claves do choque ante o conxunto leonés.
“Mario ten unha condición diferencial: ver ese último pase”
Hidalgo destacou o papel de Mario Soriano, un futbolista ao que considera clave no xogo ofensivo do Dépor:
“A diferenza con Mario está no que se lle pide a nivel defensivo. Todo o talento que temos hai que soportalo dunha maneira, e cando el está máis liberado de tarefas defensivas pode aparecer doutra forma. Ten unha condición diferencial: ver ese último pase, e temos que explotalo”.
“A categoría é das máis igualadas dos últimos anos”
O técnico valorou tamén o nivel competitivo da Primeira Federación nesta campaña:
“Creo que a categoría é das máis igualadas dos últimos anos na parte alta. Sabemos que temos o noso potencial e debemos ser valentes”.
“Temos que ser máis determinantes”
De cara ao duelo de mañá, Hidalgo quixo incidir na necesidade de dar un paso adiante en ataque:
“Temos que buscar moitas máis superioridades por fóra, ser máis determinantes e rematar máis xogadas”.
“A saída de Chacón foi unha decisión acertada”
O adestrador referiuse tamén a Luis Chacón, xogador do Deportivo cedido precisamente á Cultural Leonesa:
“Entendo que Luis está traballando para contar con sitio no Dépor e xustificar que está capacitado para o fútbol profesional. Está demostrándoo con creces. É un tipo de futbolista que precisa confianza e regularidade, e estase vendo que saír foi unha decisión acertada pola súa parte”.
“A Cultural perde ao seu mellor futbolista sen Luis”
O técnico catalán eloxiou o nivel do conxunto adestrado por Ziganda, pero lembrou a importancia da baixa do atacante galego:
“A Cultural ten moitísimo talento, aínda que conta coa baixa do seu mellor xogador, que é Luis. Terá a orde que caracteriza aos equipos de Ziganda”.
“Noubi ten unha gran saída de balón”
En canto a outros xogadores do cadro, Hidalgo fixo unha mención especial a Lucas Noubi:
“Lucas Noubi estáme axudando con moito poderío físico e unha gran saída de balón”.
“Debemos volver a ter solidez”
O preparador branquiazul recoñeceu que o equipo precisa recuperar o equilibrio defensivo:
“Vimos e analizamos moito. Imos ao mínimo detalle do que queremos… Non é o lugar para explicalo porque hai rivais que ven as roldas de prensa. En liñas xerais, deberiamos volver a ter solidez. Cando vas perdendo pezas, tes que recorrer a futbolistas doutras características e non é doado ensamblalos”.
“A unión está por enriba dos aspectos tácticos e técnicos”
O adestrador quixo destacar tamén o compromiso do grupo:
“Foron momentos difíciles nos que sabiamos que debiamos dar un paso adiante e falar claro. Sabemos onde estamos e a quen representamos. A unión é clave para min, vai por enriba dos aspectos tácticos e técnicos”.
“Mulattieri empezou a notar molestias despois do partido contra o Valladolid” .
Hidalgo explicou a situación do dianteiro Samuele Mulattieri, que arrastra problemas físicos:
“Mulattieri empezou a notar molestias despois do partido de Valladolid e cando adestraba non estaba cómodo. Tentamos seguir unha progresión”.
Sobre a súa dispoñibilidade para o encontro, engadiu:
“As baixas son as xa coñecidas. Con Samuele imos ver o adestramento. Hoxe vai intentalo, a ver que sensacións ten”.
“En Zaragoza estivemos a bo nivel en defensa”
O técnico confirmou que ten decidido quen formará na liña defensiva e valorou o rendemento recente:
“Teño claro quen vai xogar en defensa. Cando tes menos efectivos tes que recompoñer a liña, e en Zaragoza estivemos a bo nivel”.
“Gañar cámbiao todo”
Por último, Hidalgo insistiu na importancia da última vitoria para reforzar o ánimo do vestiario:
“A diferenza nos xogadores está en ter gañado. Gañar cámbiao todo. Viñamos dunha serie complicada e os días fóra da casa viñéronnos ben para compartir moito tempo. Fixemos dous bos partidos”.
O Dépor afronta así con confianza e espírito de reacción o duelo ante a Cultural Leonesa, coa intención de seguir escalando posicións e consolidar a melloría amosada nas últimas xornadas.
-Foto e vídeo : RC Deportivo
-Texto : Xosé Búa “Pirata”