PRIMEIRA FUTGAL G2
27ª Xornada
Domingo 22/03/2026
Os partidos dos equipos da Costa:
Club do Mar 2-0 SD Fisterra
Praiña SC 1-0 Camariñas FC
SD Castriz 0-0 CF Muxía
CCD Queixas 6-0 SCDR Esteirana
Clasificación : PREME AQUÍ
.
As crónicas están abertas para ir incorporando os comentarios que nos cheguen dos adestradores, xa que nós non pedimos a ninguén, o que queira pode mandalos e coma sempre son postos ao completo e baixo a sua responsabilidade.
CRÓNICA XERAL
A 27ª xornada da Primeira Futgal G2 deixou sensacións contrapostas para os equipos costeiros, cun CF Muxía que continúa firme na zona alta, mentres que pola parte baixa aumentan as preocupacións para varios representantes da Costa da Morte, especialmente tras unha fin de semana con derrotas duras e duelos directos moi igualados.
O Muxía suma e segue mirando cara arriba
O CF Muxía foi o único conxunto costeiro que conseguiu puntuar fóra de apuros nun encontro moi trabado ante o SD Castriz (0-0), tamén viñan de empatar o pasado xoves na copa, (1-1). O empate sen goles reflicte a igualdade vivida sobre o terreo de xogo, nun partido marcado polo respecto táctico e pola importancia dos puntos en disputa.
O resultado permite aos muxiáns subir unha posición na táboa e consolidarse na quinta praza con 44 puntos, mantendo vivas as opcións de seguir loitando pola zona nobre da clasificación nun tramo final de liga que se presenta moi competitivo.
Non gustou moito a arbitraxe o técnico muxián, Sergio “Pataca” : “Partido parecido ao do xoves, coa diferenza de que nós estivemos moito mellor, xerando moito máis perigo e chegando moitas veces á área do Castriz. A pesar disto, non estivemos acertados nos últimos metros e por iso chegou o 0-0.
O Castriz non tirou á porta en todo o partido, pero valeulle para conseguir un empate. Gustaríame destacar que saímos mazados coma pulpos polas numerosas entradas recibidas, sobre todo nos últimos 15 minutos, e o único que levou un cartón en todo o partido fun eu, por dicirlle que era un escándalo engadir catro minutos despois de nove cambios e de que un membro do corpo técnico do Castriz entrara a atender xogadores catro veces durante a segunda parte.”
O Castriz resiste, pero segue en zona perigosa. Para os castricenses, o empate deixa unha lectura agridoce. O punto sumado ante un rival da zona alta ten valor, pero a clasificación aperta cada vez máis pola parte baixa. Os castriceses quedan con 27 puntos, empatados co Bastavales UD, equipo que marca a fronteira do descenso.
Cada xornada convértese xa nunha auténtica final para un equipo que necesita transformar os empates en vitorias para gañar tranquilidade.
Derrota do Camariñas nun duelo directo
O Camariñas FC caeu pola mínima no campo do Praíña Sporting Club (1-0) nun choque directo pola permanencia que acabou penalizando aos costeiros. O encontro foi igualado, pero decidido por pequenos detalles que deixaron aos camariñáns sen premio.
A derrota mantén ao Camariñas na 14ª posición con 28 puntos e fai que o descenso comece a mirar de preto, co Bastavales que cun punto menos marca a primeira posición de descenso, xa “respirando no cogote” e reducindo marxes de erro nas próximas xornadas.
O Fisterra segue vivo pese á derrota
A SD Fisterra non puido puntuar ante un dos candidatos ao ascenso, o Club do Mar, que se impuxo por 2-0. A diferenza clasificatoria fixo valer o seu peso, aínda que os fisterráns continúan agarrados á loita pola salvación.
Con 24 puntos, o conxunto costeiro segue tendo a permanencia a unha distancia asumible, favorecido tamén polos resultados doutros rivais directos, polo que o obxectivo continúa plenamente aberto.
A Esteirana non levanta cabeza
A nota máis negativa da xornada chegou para a SCDR Esteirana, goleada con claridade polo CCD Queixas (6-0) nun partido sen historia que confirma o complicado momento do equipo.
A Esteirana continúa pechando a clasificación con 17 puntos e atravesa unha dinámica cunha situación que obriga a reaccionar canto antes se quere manter algunha opción de permanencia nas últimas xornadas.
A clasificación aprétase
Na parte alta, o CSD Arzúa mantén o liderado con 53 puntos, seguido moi de preto por Club do Mar e SR Calo, ambos con 50. Mentres, na zona media-alta o Muxía consolídase como o mellor equipo costeiro da categoría.
Pola contra, a zona baixa comprímese perigosamente: Camariñas e Castriz xa senten a presión directa do descenso, o Fisterra continúa na pelexa por engancharse á salvación e a Esteirana segue nunha situación límite.
A liga entra así nun tramo decisivo no que cada punto pode resultar definitivo para os intereses dos equipos da Costa.
Clasificación
1º CSD Arzúa : 53
2º Club do Mar : 50
3º SR Calo : 50
4º SD Cacheiras : 49
5º CF Muxía : 44
6º Bertamiráns FC : 43
7º Vizoño SD : 42
8º Racing San Lorenzo : 42
9º Praíña Sporting Club : 39
10º CCD Queixas : 38
11º SD Tordoia : 36
12º CF Cire de Melide : 33
13º Boimorto CF : 33
14º Camariñas FC : 28
15º SD Castriz : 27
16º Bastavales UD : 27
17º SD Fisterra : 24
18º SCDR Esteirana : 17
PRIMEIRA FUTGAL G2
28ª Xornada
Domingo 29/03/2026
Os partidos dos equipos da Costa:
SD Fisterra – SD Castriz
SCDR Esteirana – Praiña SC
Camariñas FC – Vizoño SD
CF Muxía – CSD Arzúa, ás 17:00
Clasificación : PREME AQUÍ
.
-Comentario : Propio do adestrador e baixo a sua responsabilidade
-Texto : Xosé Búa “Pirata”
-Fotos : Marina Busto