PRESENTACIÓN E ROLDA DE PRENSA DE DIEGO AGUIRRE : “CANDO ME DIXO O REPRESENTANTE DO INTERESE DO DEPOR, NIN MO PENSEI, VIÑEN COS OLLOS PECHADOS”.

 

Diego Aguirre Parra (Toledo, 17 de outubro de 1990) foi presentado esta mañá como novo xogador do Real Club Deportivo para esta temporada. En clubs anteriores aliñouse como defensa ou como extremo e, neste sentido, aclara que “atópome máis cómodo de lateral pero se o míster dime que teño que xogar arriba (por diante) voume a comer a quen sexa por xogar e dalo todo”.

Após posar para os medios gráficos no campo principal de Abegondo, acompañado polo Presidente Antonio Couceiro, Diego Aguirre indicou aos medios de comunicación que ve un vestiario con “xente humilde, boa xente, con moitas ganas de traballar”.

Subliña que Borja Jiménez “é un tío implicado que se achega ao xogador, dálle confianza. Pode ser un bonito ano”. Non cre que a idade do técnico branquiazul, 36 anos, sexa un hándicap: “Se ten as ideas claras, sabe o que quere, sabe transmitir o que quere, a idade é un número”.

En canto á esixencia do equipo, admite que o Deportivo “pola súa historia é un club moi grande. Sempre tes esa presión. Pero o xogador é polo que xoga, por un reto bonito, por loitar por algo que custe. Pode ser bonito o reto que temos. Pero hai que ser humildes, traballar desde a humildade, desde o día a día e ir todos a un tempo. Temos que facer un bo grupo porque os partidos non se van a gañar polo escudo senón polo que nos deixemos no campo”.

De feito, conta que a súa fichaxe polo Dépor foi “sinxela. O meu axente púxose en contacto comigo e díxome que o Dépor tiña a idea de contratarme. Eu nin mo pensei. Ten moita historia, é un Club moi grande aínda que agora mesmo estea nas súas horas baixas. É un reto bonito devolvelo á liga profesional. Nin mo pensei”.

Confesa ademais que o ex deportivista Borja Valle, co que coincidiu no Real Oviedo, “comentoume como era o Club por dentro, o que leva defender este escudo. Está na Primera RFEF pero é coma se estivese en Primeira División. Nin mo pensei. Vinme cos ollos pechados”.

Finalmente, en canto á configuración dos dous grupos nos que quedou constituída a Primeira RFEF, o centrocampista branquiazul sostén que “son máis ou menos iguais” en canto a potencial. “Ata que non os ves no campo non podes dicir cal é mellor e cal é peor. Neste grupo hai bos candidatos a subir, o Real Racing Club, a Cultural o ano pasado estivo moi ben… Hai varios equipos que podes dicir que están aí arriba”, opina.

 

Diego Aguirre, foi a segunda fichaxe para a próxima campaña do Depor 2021/22, despois de finalizar o seu contrato co CD Numancia.

Formado no conxunto da súa cidade natal, o extremo manchego tamén deu o salto ao fútbol profesional nas filas do CD Toledo. Despois de dúas temporadas no filial toledano, debutou co primeiro equipo no curso 2011-2012, en Segunda División B. Xogou tres campañas no CD Toledo, dúas en Segunda División B (58 partidos e 7 goles) e unha en Terceira.

A súa boa última temporada, na que chegou a xogar o playoff de ascenso a Segunda División no que o CD Toledo foi eliminado polo Lleida Esportiu, atraeu o interese do Rayo Vallecano, que o fichou no verán de 2014. A partir de entón, Diego Aguirre xogou cinco temporadas consecutivas en Segunda División: as dúas primeiras cedido no CD Leganés (36 partidos e 2 goles) e o Real Oviedo (24 partidos), as dous seguintes co cadro vallecano (37 partidos e 3 goles) e a última, a 2018-2019, no Real Zaragoza (20 partidos), ao que xa se incorporou en propiedade cun contrato de tres anos.

Con todo, despois dunha soa temporada foi traspasado ao Apollon Limassol. Na formación chipriota militou durante dous cursos (25 partidos e 1 gol) nos que ademais puido debutar en competición europea, xogando 11 encontros na Europa League. O pasado verán incorporouse ao CD Numancia, no que actuou a pasada campaña en Segunda B, unha categoría na que totaliza 70 partidos, aos que hai que sumar os 117 que acumulou na categoría de prata máis os 25 no campionato chipriota e os 11 na Europa League.

-Foto e Vídeo : RC Deportivo

-Texto : piratasdemuxia/RC Deportivo


Attachment

Utilizamos cookies propias e de terceiros para o correcto funcionamiento da web. Se continúa navegando, acepta o seu uso.

ACEPTAR
Aviso de cookies