O RC DEPORTIVO XUVENIL “A” XA ESTÁ EN SEMIFINAIS DA “COPA DE CAMPIÓNS”, TRAS PASAR NOS PENALTIS ANTE O UD LAS PALMAS.

Once inicial do RC Deportivo Xuvenil “A” en Canarias.

 

UD La Palmas Juvenil “A” 2-1 RC Deportivo Xuvenil “A”

O RC Deportivo clasificouse este mediodía para a ‘Final Four’ da División de Honra xuvenil ao superar á UD Las Palmas na quenda de penaltis (1-3) do partido de volta de cuartos de final disputado no Anexo ao Estadio Gran Canaria. 

Ao final do tempo regulamentario e da prórroga chegouse con 2-1 no marcador a favor dos canarios, o mesmo marcador que na ida de Abegondo, pero neste caso a favor dos branquiazuis.

Este mediodía, a UD Las Palmas púxose con vantaxe provisional no marcador (2-0) a pesar de que o Xuvenil A tivo ocasións para perforar a meta rival, por exemplo unha cabezada de Noel ao traveseiro xusto antes do primeiro tanto local.

A pesar da adversidade no marcador, os pupilos de Óscar Gilsanz continuaron co seu fútbol, mesmo con presión alta ao equipo rival, e obtiveron o seu premio no minuto 82, co tanto de Noel que forzaba a prórroga.

No tempo extra ambos os equipos tiveron as súas oportunidades pero xa o cansazo fixo madeixa nos futbolistas canarios e galegos, co que faltou claridade para definir os diversos achegamentos á área.

Na lotaría dos penaltis, o meta deportivista Brais foi decisivo ao deter dúas penas máximas aos lanzadores da UD Las Palmas.

Xuvenil A: Brais, Trilli, Guille Bueno, Fito, Dani Barcia, Brais Val, Víctor, Mario, Noel, Nájera e Mella. Tamén xogaron: Do Carmo, Raúl, Yeremay, Nico, Padín e Jairo

 

A Semifinal ante o Real Madrid en Marbella

O Real Madrid será o rival do RC Deportivo na semifinal da Copa de Campións da División de Honra xuvenil. Os brancos superaron por 2-1 nos dous partidos de cuartos de final ao Atlético de Madrid.

Málaga CF e FC Barcelona, que eliminaron ao Athletic Club e Levante UD respectivamente, protagonizarán a outra semifinal.

A Federación Española de Fútbol elixiu as instalacións do Marbella Fútbol Center para a celebración desta ‘Final Four’.

As semifinais xogaranse o xoves 24 en horario por fixar. Os gañadores pasarán á gran final, o domingo 27.

Os pupilos de Óscar Gilsanz buscarán o broche de ouro a unha gran temporada após proclamarse campión do grupo primeiro da División de Honra.

.

-Foto e Texto : RC Deportivo/piratasdemuxia


Attachment

Utilizamos cookies propias e de terceiros para o correcto funcionamiento da web. Se continúa navegando, acepta o seu uso.

ACEPTAR
Aviso de cookies