O FERROL MANDA PARA O DEPORTIVISMO 900 ENTRADAS AO ABUSIVO PREZO DE 20 EUROS.

 

O Ferrol mandoulle ao RC Deportivo un paquete de 900 entradas ao abusivo prezo de 20 euros, o que levantou nas redes sociais o unánime rexeite a este abuso, nun estadio moi lonxe do que é Riazor e non pon eses prezos. Como xa pasou en Majadahonda, este é un medio de lucrarse a costa da afección que máis persoas move do fútbol español. Moitos deportivistas pídenlle ao clube nas redes sociais que lle devolva as entradas aos ferroláns.

Así nos informa o RC Deportivo da venta de entradas :

O Racing Club de Ferrol comunicou ao RC Deportivo a posta a disposición do Deportivismo de 900 localidades de cara ao partido do próximo sábado 4 de decembro ás 19:00 h. na Malata.

Os Deportivistas disporán desas 900 entradas de Preferencia a un prezo de 20 euros. Pola alta demanda prevista, o RC Deportivo activa o seu procedemento interno de xestión para axilizar os tempos e trámites de venda das mesmas durante esta semana. Co fin de coñecer a demanda real de entradas, evitar colas e esperas innecesarias se a demanda é maior que a oferta, e poder ordenar do mellor modo posible os procesos de venda, desde hoxe e até mañá martes ás 23:59 h. actívase a web de pre reserva de entradas para o partido.

A solicitude debe realizarse na páxina web: http://reservas.rcdeportivo.es/

Poderán optar a solicitar unha ou dúas entradas todas as persoas socias do RC Deportivo de alta antes das 19:00 h. de hoxe luns 29 de novembro de 2021.

Unha vez pechado o prazo de solicitude, e dado que todas as persoas socias que desexen acudir ao partido deben facilitar un correo electrónico de contacto no momento da petición, por esa mesma vía o Club informará directamente ás interesadas da dispoñibilidade ou non das entradas e do procedemento de identificación de usuarios, retirada e pago das mesmas. As solicitudes para a repartición de entradas ordenaranse seguindo o criterio de antigüidade como socia ou socio do RC Deportivo.

Se todo o procedemento interno e entre clubs desenvólvese con normalidade, a previsión é poder vender fisicamente, ás persoas adxudicatarias, as entradas na Oficina de Atención ao Deportivista o mércores pola tarde (de 16:30 a 19:00 e o xoves todo o día: de 10:00 a 13:30 e de 16:30 a 19:00 h.). Se houbese excedente ao peche da xornada do xoves, avisaríase ás persoas socias en lista de espera para retiralas ao longo do venres.

A Federación de Peñas do RC Deportivo tamén xestionará pola súa conta a cota do total de entradas (40%: 360 localidades) correspondente por convenio entre entidades para partidos deste tipo.

-Foto e Texto : rcdeportivo.es/piratasdemuxia