O DEPOR CAE EN CÓRDOBA POR PERDONAR EN ÁREA CONTRARIA E VERSE SUPERADO NO SEU CAMPO.

 

Córdoba 2-0 Depor

O Depor fixo o peor encontro do que vai de campionato, comezou ben, tivo duas ocasións moi claras e foise o descanso perdendo 1-0, cun gol de novo a balón parado, unha vez máis. Na segunda metade non foi quen de sacarse de enriba o domio do Córdoba, pero tivo outras duas ocasións moi boas. No desconto Pablo Martínez facía un penalti innecesario. Foi mellor o equipo cordobés e levouse os puntos, pero segundo as diferentes crónicas, o mellor do partido foi o porteiro do equipo local.

Crónica do RC Deportivo na sua web : 

O Cordoba CF e o Deportivo abriron esta noite (2-0) a 5ª xornada en LaLiga Hypermotion no Nuevo El Arcángel nun partido decidido nas áreas, tal e como manifestou Imanol Idiakez na sala de prensa: “Isto vai de acertar. Neste nivel as áreas decídeno todo”, declarou.

Os branquiazuis chegaron a este segundo partido consecutivo en Andalucía, após o de Granada do pasado sábado, coa baixa de Sergio Escudero, que segue co seu proceso de recuperación; e de Mfulu, con “unha sobrecarga. Esperemos que a próxima semana estea xa a disposición”, manifestou o técnico deportivista.

Cunha temperatura roldando os 30 graos, Imanol Idiakez introduciu un cambio respecto ao Nuevo Los Cármenes granadino. Bouldini substituíu na punta de ataque a Iván Barbero.

Villares formou no lateral destro con Mella por diante. Mario Soriano, como pasou en Granada, emparellouse con Jose Ángel no mediocentro.

Pola súa banda, o Córdoba CF dos ex deportivistas Adrián Lapeña e Kuki Zalazar, encarou o seu segundo encontro consecutivo en casa após o da pasada fin de semana tamén no Nuevo El Arcángel ante o Málaga CF e que finalizou con empate sen goles (0-0).

Os andaluces saíron a por o Dépor esporeados polo gran ambiente e ao minuto de xogo xa forzaron un saque de esquina.

Aos 8 minutos, o colexiado do partido anulou un gol a Casas por fóra de xogo. 

O encontro era un ida e volta nas dúas áreas aínda que quizais con algo máis de presenza verdibranca na área rival, apoiado nunha presión alta á saída de balón deportivista.

No entanto, o Dépor tivo a súa ao cuarto de hora. Rouba Mella na saída de balón e o seu pase atrás, ao que non chega Lucas, remátao chegando desde atrás Yeremay. Sacou a meta Marín baixo paus cando xa se cantaba o gol.

Yeremay e Mella empezaron a facer dano polas dúas bandas aínda que o Córdoba CF roldou a área de Helton con chegadas sobre todo pola súa banda dereita con Carracedo.

Sufría o Dépor, que perdeu de vista neste tramo do partido á área rival.

Puido marcar Albarrán no primeiro pau pero o seu chute márchase ao poste esquerdo da meta deportivista.

Conseguiu sacudirse o dominio o Dépor coa pelota. Lucas, aos 39 minutos, téntao desde o frontal pero o balón sae demasiado alto.

De novo o capitán deportivista puido marcar nunha contra lanzada por Yeremay pero o seu chute en posición algo escorada sácao Marín nunha boa intervención.

Jacobo téntao case desde 30 metros. Helton responde cunha gran parada enviando a saque de esquina.

Foi o preámbulo do gol. Carracedo, ao segundo pau e libre de marca, bate por baixo a Helton após o córner. Outra acción a balón parado que custou caro.

O tanto espoleó aínda máis aos andaluces, dominadores antes do descanso.

O primeiro tempo concluíu cun chute frouxo e raso de Yeremay que se marcha fóra por pouco.

“Houbo de todo. Houbo momentos nos que nos custou sacar a pelota, que nos custou interpretar, pero con 0-0 tivemos dous moi claras, a de Lucas e Yeremay. Non as convertemos e fixéronnos un gol nun balón parado nun gol de calidade pero temos que darlle unha volta porque non podemos encaixar ese tipo de goles”, resumiu o adestrador branquiazul.

Após o paso polos vestiarios, Mella tivo a primeira ocasión pero o seu remate, centrado, sácao Marín ben situado.

Insistiu o conxunto local nunha presión alta para evitar a saída de balón controlada dun Dépor que arrincou ben. 

Imanol comezou a mover pezas. Barbero saltou ao céspede por Bouldini para refrescar o ataque.

Aos 68 minutos Carracedo deu o pase da morte a Obolskii pero o seu remate márchase fóra por moi pouco. 

Barbero no 70 tivo o empate só ante Marín despois de recibir de Lucas. O meta cordobesista gañou no man a man. 

Á saída do córner en curto, Yeremay métese na área e cruza en exceso o balón entre un bosque de pernas.

O partido non tiña dono e podía caer dun lado ou outro.

Aproveitando a pausa de hidratación, Imanol dá entrada a Obrador e Cristian Herrera por Mella e Ximo Navarro para o último arreón.

Cristian, no 80, disparou cruzado e de novo sacou Marín co pé. O Córdoba CF, por momentos, deu un pase atrás.

No outro área Calderón, nunha transición rápida, xutou ao lateral da rede de Helton.

Mendes, noutro veloz contragolpe, disparou ao pau deportivista.

E chegou o fatídico desconto, que deixou un mal sabor de boca a Imanol Idiakez: “O que peor xogamos foi a prórroga. Decidimos pegarlle pelotazos e aí o que fixemos foi mandar o balón para que volvese, con pouca xente detrás da pelota. O máis probable era o que pasou, que nos metesen o segundo”, comentou Imanol Idiakez en referencia a un penalti claro labor por Pablo Martínez que transformou Yoldi no definitivo 2-0.

Córdoba CF: C. Marín, Calderón, Lapeña, Marvel, Álex Sala (Mendes, min. 69) Theo (C. Isaac, min. 78), Isma Ruiz, Jacobo Glez. (Genaro, min. 69), A. Casas (Obolskii, min. 63), Albarrán (Ander Yoldi, min. 78) e Carracedo

Deportivo: Helton, Ximo Navarro (Cristian Herrera, min. 78), Pablo Vázquez, Pablo Martínez, Mella (Obrador, min. 78), Villares (Petxarromán, min. 86), Jose Ángel, Mario Soriano, Yeremay, Lucas e Bouldini (Barbero, min. 62)

Árbitro: Eder Mallo Fernández, do comité castelán-leonés. Amoestou a Álex Sala (min. 21), Barbero (min. 67), Lapeña (min. 85), Genaro (min. 90) e Lucas (min. 90)

Goles: 1-0 Carracedo (min. 43); 2-0, Ander Yoldi (min. 90+6), de penalti

Incidencias: partido da 5ª xornada disputado no Nuevo El Arcángel con 150 deportivistas nas bancadas entre os 16.435 espectadores.

 

 

-Foto e vídeo RC Deportivo

-Texto : Xosé Búa “Pirata”/RC Deportivo