Mario Soriano converteuse no protagonista da actualidade deportivista tras ser recoñecido como mellor xogador branquiazul do mes de decembro no marco dos premios Estrella Galicia. O centrocampista recibiu o galardón nun momento clave da tempada e aproveitou para analizar con serenidade tanto o presente inmediato do equipo como algúns dos retos que se aveciñan.
Coa vista posta no próximo compromiso ligueiro, Soriano advertiu da esixencia máxima que suporá a visita ao campo da UD Las Palmas. O madrileño destacou a identidade clara do conxunto canario e a súa capacidade competitiva, subliñando a importancia de reducir ao mínimo os erros se o Dépor quere regresar con puntos. Para el, a concentración e a solidez serán determinantes nun encontro que prevé moi disputado.
O xogador tamén se referiu á baixa de Miguel Loureiro, que non poderá viaxar a Canarias por sanción. Aínda que recoñeceu o peso específico do defensa, presente en todos os encontros ata o de agora, Soriano quixo poñer en valor a profundidade do cadro deportivista e a confianza nos compañeiros chamados a suplilo, insistindo en que o equipo debe manter o seu nivel independentemente das ausencias.
Houbo espazo tamén para a autocrítica ao lembrar o empate fronte ao Cádiz. Soriano recoñeceu que o partido se escapou en accións puntuais perfectamente evitables e lamentou non ter sabido pechar un encontro no que o Dépor xerou ocasións dabondo. Con todo, valorou positivamente a imaxe ofrecida, especialmente en comparación cos últimos compromisos do mes de decembro, destacando a capacidade do equipo para competir e dar a cara.
Mario agradeceu o apoio dos afeccionados trala gran pancarta que despregaron en Abegondo os Riazor Blues co lema : “Xaneiro 2024: 1ª RFEF. Xaneiro 2026: a 4 puntos de primeira. AQUÍ NON SE RENDE NINGUÉN”.
Por último, o centrocampista mirou con ilusión ao choque de Copa do Rei ante o Atlético de Madrid, un rival moi especial para el. Tras trece anos vencellado á entidade rojiblanca e un debut copero coa súa camiseta, Soriano definiu o encontro como unha cita emotiva e atractiva. O partido disputarase en Abanca Riazor ás nove da noite, o martes 13 ou o mércores 14 de xaneiro, á espera de que o Atlético resolva a súa participación na Supercopa de España.
Recoñecido polo seu rendemento e coa cabeza xa posta nos próximos desafíos, Mario Soriano continúa a consolidarse como unha das pezas clave do Dépor nesta tempada.
-Vídeo : RC Deportivo
-Texto e montaxe : Xosé Búa “Pirata”