LXI COPA DA COSTA
Previa
Domingo 07/12/2025
UD Corcubión – Sporting Zas, 28/12, ás 16:00
UD Cerqueda 0-3 Ponteceso SD
CD Nantón – Cabana SD, 28/12, ás 16:00
SCD Buño 0-2 SCD Malpica
Previa recortada pola falta de efectivos
A LXI Copa da Costa presentaba unha previa composta por catro encontros, mais só dous puideron disputarse. Dous choques quedaron adiados para o 28 de Nadal, “Día dos Santos Inocentes”, logo de que os equipos implicados acordasen aprazalos por non contar con efectivos suficientes. O mal tempo e as numerosas baixas marcaron unha xornada totalmente condicionada, nunha época que non lle gusta a ninguén que se xogue.
SCD Buño 0-2 SCD Malpica
O derbi malpicán cae do lado visitante
O Campo de Xaviña, en Buño, acolleu un derbi de máxima rivalidade no que o SCD Malpica impúxose por 0-2 ao SCD Buño, certificando así a súa presenza nos dezaseisavos de final, onde se medirá ao CF Lira o 4 de xaneiro de 2026.
O encontro estivo marcado polas enormes dificultades do conxunto oleiro, que só puido presentar dous xogadores de campo e un porteiro no banco. Aínda así, o Buño mantívose firme na primeira metade, cun choque moi físico e condicionado pola choiva e o vento.
Non foi até o minuto 57 cando Pablo García abriu a lata para o Malpica, culminando unha transición rápida que rompeu o equilibrio. O Buño tentou reaccionar, pero a falta de trocos pesou nos minutos finais, nos que Crístian Fernández, no 83’, sentenciou cun disparo cruzado que puxo o definitivo 0-2.
O Malpica supera así a eliminatoria e continúa con paso firme nun torneo que coñece moi ben.
UD Cerqueda 0-3 Ponteceso SD
O Ponteceso resolve pola vía rápida
No segundo encontro disputado en Xaviña, outro derbi de proximidade, o Ponteceso SD impúxose con claridade por 0-3 á UD Cerqueda, nun choque decidido practicamente na primeira metade.
O cadro da Terra de Pondal golpeou cedo: Abel García, aos 20 minutos, fixo o 0-1 aproveitando unha xogada interior. Apenas nove minutos despois, no 29’, Hadrián ampliaba a vantaxe poñendo costa arriba o duelo para o Cerqueda.
Antes do descanso, no 40’, de novo Abel García apareceu para asinar o seu dobrete e deixar moi encarrilada a clasificación pontecesá. Na segunda metade o marcador xa non se movería, nun tramo final no que o mal tempo foi protagonista e deixou o xogo moi condicionado.
Co triunfo, o Ponteceso avanza a dezaseisavos de final, onde se enfrontará ao SD Castriz.
ENCONTRO E HORARIOS
-DAZASEISAVOS-
-03/01/2026-
Atlético Pereiriña-Camariñas FC
SD Camelle-Outes FC
SD Oza-CD Muros
SD Coristanco-Cabana SD
Intre de Brens-Xallas FC
-04/01/2026-
Ponteceso SD-SD Castriz
CF Mazaricos-SD Fisterra
SD San Lorenzo-CF Muxía
CD Baiñas-UD Monte Louro
SD Laxe-CD Baio
Sporting Seaia CF- Sporting Zas
CF Dumbría-SD Sofán
CF Lira-SCD Malpica
CF Corme-SCDR Esteirana
Volantes de Baño FC-Soneira SD
UC Cee-CF Porteño
–
-Foto e texto : Xosé Búa “Pirata”