LIGA DA COSTA, (28ª Xda) : “Por arriba entra en combustión por abaixo arde, a falta de dúas xornadas”.

Así nos conta Rubén Forján, adestrador do Zas o que foi este encontro : 

“O Sporting Zas afrontaba ante o Sofán B unha das tres finais que lle restan nesta recta final, nun escenario no que a situación da Primeira Futgal e os posibles arrastres dos equipos costeiros están a encarecer cada vez máis a salvación. A día de hoxe, o descenso márcao o Muros con 35 puntos e a tensión competitiva é tal que, dende a zona baixa ata equipos situados na metade alta, todos están obrigados a sumar para non verse metidos nos últimos postos. Co Mazaricos xa descendido esta semana, o resto de conxuntos pelexarán ata o final por asegurar a permanencia.

O partido disputouse en condicións estupendas no Carral, con bo ambiente nas bancadas e dous equipos conscientes do que había en xogo. Nos primeiros compases, o Sofán saíu mellor, con máis presenza e máis chegadas á portería de Pereiras. O gardameta zasense, moi seguro durante todo o encontro, volveu ser decisivo nun tramo de liga no que está a sostelo equipo con intervencións de moito mérito. Aínda que houbo ocasións nas dúas áreas, as máis claras da primeira metade caeron do lado local, pero o Sofán non atopou a fortuna do gol e o descanso chegou co marcador en branco.

Tras o paso polos vestiarios, o Zas modificou o debuxo para frear a dinámica do rival e o cambio notouse. O Sporting atopouse mellor, gañou metros e comezaron a aparecer as ocasións máis claras do seu lado. E nese momento de maior control chegou unha boa asistencia de Redondo que atopou a cabeza de Juan, que anotou o 0-1. Un gol que sentou como un auténtico xerro de auga fría no Sofán e que confirmou a mellor versión do Zas na segunda parte.

A partir dese tanto, o encontro entrou nun tramo máis de disputa, con máis xogo aéreo e máis imprecisións, propio da tensión e do desgaste. O Sofán tentou responder, pero o marcador xa non se movería.

Vitoria de enorme valor para o Sporting Zas, que suma tres puntos e mantén a clasificación comprimida ao máximo nunha das loitas pola permanencia máis caras que se lembran na Liga da Costa, onde cada detalle e cada partido están a decidir o destino de moitos equipos.”

Soneira SD 1-2 UD Corcubión 

Así nos conta Isidro Trillo, adestrador do Corcubión o que foi este encontro : 

“Partido moi disputado, con moitas ocasións. O Soneira tocando moi ben e nós defendendo e saíndo á contra con moito perigo. Así nos puxemos por diante: unha contra na que Luis, en velocidade, levou ao defensa, tirou, parou o porteiro e o rexeite foille a Rama, que marcaría o 0-1.

Seguimos igual, co Soneira tocando moito e movéndose moi ben, pero nós moi ben ordenados. E Martín, desde case o medio campo, vería o porteiro adiantado e marcaría o 0-2 nun golazo. Pouco despois marcarían eles, nun único despiste que tivemos, e así acabaría a primeira parte.

Na segunda aínda estivemos mellor ca na primeira. Tivemos 4 ou 5 ocasións moi claras, man a man, que esas hai que metelas. O árbitro perdooulle a vermella ao porteiro deles: Luis puxéralla por arriba e o porteiro, fóra da área, deulle coa man. Sería unha expulsión moi clara que lle perdoou o árbitro.

O Soneira intentouno ata o final, sen premio. Bo triunfo do Corcubión, merecido, e seguir que isto non acabou!!”.

.

Xallas FC 2-0 Outes FC