LIGA DA COSTA
24ª Xornada
Domingo 29/03/2026
Sporting Zas 3-2 UD Corcubión
CF Corme 4-3 Outes FC
CD Muros 0-0 SCD Malpica
CF Mazaricos 2-0 UD Monte Louro
SD San Lorenzo 1-2 CD Baio
Soneira SD 1-1 CF Porteño
SD Sofán ” B” 4-3 Cabana SD
Xallas FC 6-1 Ponteceso SD
.
As crónicas están abertas para ir incorporando os comentarios que nos cheguen dos adestradores, xa que nós non pedimos a ninguén, o que queira pode mandalos e coma sempre son postos ao completo e baixo a sua responsabilidade.
CRÓNICA XERAL
A Liga da Costa entrou nunha nova dimensión competitiva tras unha 24ª xornada absolutamente trepidante, chea de goles, (33 cunha media de 4´12 por encontro), remontadas, partidos decididos no desconto e cambios importantes tanto na loita polo liderado como na zona baixa.
O gran beneficiado da xornada foi o Xallas FC, que asaltou o liderado logo dunha goleada contundente sobre o Ponteceso SD. Os xalleiros aproveitan así o empate do Porteño en Vimianzo para colocarse primeiros con 45 puntos, deixando a clasificación máis apertada ca nunca na cabeza.
O Porteño CF, que chegaba lanzado tras recuperar o liderado a pasada semana, atopou un Soneira competitivo que freou a súa dinámica nun encontro intenso e con expulsións. O empate deixa aos da Ponte do Porto a só un punto do novo líder.
Por detrás, o CD Baio dá un golpe enriba da mesa ao vencer no campo dun rival directo como o SD San Lorenzo. Os de Verdillo encadean unha mala serie de resultados, pero seguen plenamente metidos na pelexa, mentres que os baieses se colocan a só cinco puntos do primeiro posto e presentan candidatura seria a todo.
Na zona media, o CF Corme protagonizou un dos partidos máis espectaculares da xornada cun triunfo no último minuto fronte ao Outes FC, mentres que o SD Sofán B tamén sumou tres puntos nun encontro tolo diante do Cabana SD, consolidándose nunha posición máis cómoda.
O empate sen goles entre CD Muros e SCD Malpica resultou máis entretido do que reflicte o marcador e permite aos malpicáns afastarse lixeiramente da zona quente, onde a tensión continúa aumentando.
O Zas mandou ánimos o compañeiro Guille.
Na parte baixa, o Sporting Zas asinou unha vitoria épica ante o UD Corcubión pese a xogar en inferioridade, comprimindo aínda máis a clasificación. Pola súa banda, o CF Mazaricos venceu un duelo directo ante o UD Monte Louro e abandona o último posto, que pasa agora aos loureiros.
Con seis xornadas por diante, a Liga da Costa preséntase aberta en todos os seus frontes: loita polo ascenso, batalla pola promoción e unha zona baixa na que case ningún equipo pode permitirse relaxarse.
Para a liga e ven a Copa
A vindeira fin de semana non haberá competición no que a liga se refire por mor das celebracións da Semana Santa, pero sí que haberá copa. Xóganse a encontro único as semifinais da “LXI Copa da Costa” o 5 de Abril. O CF Muxía recibirá na Arliña o SD Sofán da Preferente Norte e o SCD Malpica recibe no Pedra Queimada o CF Porteño.
CRÓNICAS
Lance do xogo no San Andrés.
Sporting Zas 3-2 UD Corcubión
Partido épico en San Andrés nun encontro marcado polas baixas locais e pola igualdade constante no marcador, resolto cun gol no desconto que desatou a tolemia entre a afección zacense.
O Sporting adiantouse cedo, respondeu o Corcubión e o duelo mantívose aberto ata o final, incluso coa expulsión dun xogador local que obrigou aos de Zas a resistir con dez durante boa parte da segunda metade. Cando todo apuntaba ao empate, un córner decidiu o choque.
Goles: 1-0, Darío (3´); 1-1, Iago Lema (16´); 2-1, Estalote (37´); 2-2, Rama (67´); 3-2, Pablo Fuentes (90´).
Rubén Forján (adestrador do Sporting Zas):
“O Sporting disputaba na mañá o encontro fronte ao Corcubión, moi condicionado polas numerosas baixas por lesión e sanción que deixaban ao equipo local moi xusto de xogadores. Nese escenario de adversidade, o Zas respondeu cun partido de moito mérito, competindo con cabeza, sufrindo cando tocou e atopando premio no tramo final.
O equipo saíu enchufado e moi metido no encontro, e nos primeiros compases Darío adiantou aos locais cun gol de tacón. A reacción visitante non tardou: ao redor do cuarto de hora, Iago Lema igualou o marcador cun gol de falta directa que devolvía o equilibrio.
Co 1-1, o partido entrou nunha fase máis trabada, con moito mediocampismo e poucas ocasións claras. O xogo fíxose máis directo e as defensas impuxéronse durante varios minutos, ata que unha boa internada de Juan rematou cunha conexión con Chiki, que devolveu a vantaxe ao Zas e permitiu chegar ao descanso co 2-1.
Na segunda metade o encontro volveu moverse nun guión similar, con pouco fútbol elaborado e moitas transicións, accións en longo e segundas xogadas. O punto de inflexión chegou arredor do minuto 60 coa expulsión de Anxo, que obrigou ao Sporting a disputar outro partido máis en inferioridade numérica. Cinco minutos despois, o Corcubión aproveitou o empuxe e logrou de novo o empate, poñendo o 2-2 e deixando o choque nun escenario de máxima tensión.
A partir de aí, o Corcubión moveu o banquiño en busca da vitoria, mentres o Zas, con dez, tratou de resistir con orde e buscar algunha contra para facer dano. O partido avanzaba cara a un final de nervios, no que ningún dos dous conxuntos conseguía materializar as súas chegadas ata que apareceu o balón parado.
Nos últimos compases, un córner servido á área atopou a cabeza de Pablo Fuentes, que fixo o 3-2 e desatou a celebración en San Andrés. Un gol que vale ouro e que confirma unha vitoria de enorme mérito do Sporting Zas, non só polo resultado, senón polo contexto e pola maneira na que o equipo soubo xestionar un encontro marcado polas baixas.
Este triunfo deixa, ademais, unhas seis últimas xornadas da Liga da Costa de infarto. Na parte alta, varios equipos pelexan polo ascenso directo e pola promoción; no medio, Outes e Malpica semellan quedar nunha zona máis estable; e, a partir do sétimo clasificado, ábrese unha batalla durísima por evitar tanto o descenso directo como os posibles arrastres da Primeira (que poden ser ata 3), nun tramo final no que o calendario, o estado físico e a capacidade de competir de cada equipo van marcar quen pertence á Liga da Costa e quen baixa a Terceira.”
Isidro Trillo (adestrador do UD Corcubión):
“Non hai moito que contar, partido caseque todo para nós, un partido que non deberiamos perder nunca, eles chegaron 3 veces e marcaron as 3. Adiantáronse eles e empatamos cun golazo de Iago de falta, pero marcarían de novo eles. Na segunda eles quedaron cun menos por un agarrón claro a Iago. Empatamos tras boa xogada na que César dálle a Rama que marca a pracer, aínda tiñan que quedar cun menos e cando mellor estabamos acumulando moitas ocasións, de César, Iago, Samu, Rama… e nun saque de curruncho márcannos de cabeza. Toca apertar pois temos un calendario moi complicado contra equipos que todos se xogan algo. Estamos tendo moitas ocasións e non marcamos e a nós márcannos fácil. Vai haber que cambiar o chip senón, como descendan tantos como parece que vai ser, imos telo complicado.”
Incidencias: o colexiado David Castro expulsou con dobre cartón a Ánxo Souto (53´ e 61´) e o segundo adestrador zacense Alfredo Pereiro (43´ e 68´).
CF Corme 4-3 Outes FC
Un auténtico festival ofensivo no que o Corme acabou levando os tres puntos cun gol no minuto 90 tras un partido cheo de alternativas e emoción ata o último segundo.
Goles: 0-1, Manel (36´); 1-1, Álvaro (42´); 2-1, Samu Costa (46´); 2-2, Sergio (51´); 3-2, Aitor (69´); 3-3, Adrián, de penalti (85´); 4-3, Mauro (90´).
CD Muros 0-0 SCD Malpica
Empate sen goles nun partido moito máis atractivo do que reflicte o marcador final. Ambos equipos gozaron de boas ocasións, pero as defensas e os porteiros impuxéronse aos atacantes.
O punto sabe mellor ao Malpica, que se afasta algo máis da zona perigosa, aínda que a igualdade da clasificación impide calquera relaxación.
Goles: 0-0
CF Mazaricos 2-0 UD Monte Louro
Duelo directo pola permanencia resolto no tramo final para un Mazaricos que soubo esperar o seu momento e golpeou cando máis doía ao rival. Os locais collen aire na clasificación e abandonan o último posto, mentres o Monte Louro pasa a pechar a táboa.
Goles: 1-0, Fabián (82´); 2-0, Fran Landeira (85´).
SD San Lorenzo 1-2 CD Baio
Partido de máxima tensión entre dous aspirantes á zona alta que acabou caendo do lado visitante grazas á súa eficacia nos momentos decisivos. O San Lorenzo suma xa cinco xornadas sen gañar, mentres o Baio se achega perigosamente á loita polo liderado.
Goles: 0-1, Mamadou (24´); 0-2, Javi Muíño (89´); 1-2, Pape (90´).
Soneira e Porteño no Irmandiño.
Soneira SD 1-1 CF Porteño
O Soneira conseguiu frear a dinámica dun Porteño que chegaba en pleno estado de forma e que perdería o liderado tras este empate. Os da ponte do Porto viñan de marcar 17 goles nos 3 anteriores encontros e con 3 vitorias seguidas. O Soneira pola sua banda suma o terceiro empate seguido e o cuartos nos derradeiros 5 encontros.
Goles: 0-1, Babacar (2´); 1-1, Richi (47´).
Incidencias: o colexiado Iván Guerra expulsou por dobre cartón ao xogador do Soneira Javi Oreiro (33´ e 43´) e ao do Porteño Paredes (66´ e 74´).
SD Sofán B 4-3 Cabana SD
Outro dos encontros tolos da xornada, con sete goles e alternancias constantes no marcador. O Sofán B golpeou primeiro e soubo resistir a reacción final do Cabana.
Goles: 1-0, Daniel Rodríguez (1´); 2-0, Adrián Vázquez (10´); 2-1, Brais (13´); 3-1, Adrián Vázquez (17´); 4-1, Ignacio (64´); 4-2, Xabier (67´); 4-3, David Rey, de penalti (77´).
Xallas FC 6-1 Ponteceso SD
Exhibición ofensiva do novo líder da Liga da Costa, que non deu opción ao Ponteceso nun partido dominado de principio a fin polos xalleiros.
Goles: 1-0, Bryan (3´); 2-0, Bryan (5´); 2-1, Alberto Recarey (45´); 3-1, Bryan (55´); 4-1, Adrián López (65´); 5-1, Alberto Jallas (70´); 6-1, Alberto Jallas (80´).
Bruno Prego (adestrador do Xallas FC):
“Partido moi completo do noso equipo na casa, onde conseguimos unha contundente vitoria por 6-1 nun encontro que comezou cun ritmo altísimo.
Nos primeiros compases xa deixamos claro o noso dominio. Aos 5 minutos de xogo, o marcador reflectía un claro 2-0, grazas á intensidade, á presión alta e á eficacia de cara a portería. A partir dese momento, o equipo optou por replegar liñas, buscando controlar o ritmo do partido e evitar riscos innecesarios.
O rival, sen crear demasiado perigo, conseguiu recurtar distancias preto do descanso cun gol tras unha falta, deixando o marcador en 2-1 ao remate da primeira metade.
Na segunda parte, o equipo deu un paso adiante e mostrou a súa mellor versión. Co control total do balón e do xogo, chegaron os goles que sentenciaron o encontro. Bryan foi o gran protagonista cun espectacular hat-trick, demostrando olfacto goleador e gran capacidade de finalización. Pola súa banda, Peke asinou un auténtico gol olímpico.
Para completar a goleada, o xuvenil Alberto sumouse á festa con dous goles, amosando personalidade e eficacia nos minutos que estivo sobre o terreo de xogo.
En definitiva, segunda parte controlada cunha gran eficacia ofensiva, que permitiu pechar un partido redondo diante da nosa afección“.
CLASIFICACIÓN
1º Xallas FC : 45
2º Porteño CF : 44
3º SD San Lorenzo : 42
4º CD Baio : 40
5º Outes FC : 37
6º SCD Malpica : 35
7º SD Sofán B : 33
8º Cabana SD : 32
9º Soneira SD : 32
10º CF Corme : 32
11º Ponteceso SD : 31
12º UD Corcubión : 30
13º CF Mazaricos : 27
14º CD Muros : 26
15º Sporting Zas : 25
16º UD Monte Louro : 24
.
.
LIGA DA COSTA
25ª Xornada
Domingo 12/04/2026
UD Monte Louro – Sporting Zas
UD Corcubión – CF Corme
Outes FC – CD Muros
SCD Malpica – SD Sofán ” B”
Cabana SD – Soneira SD
CF Porteño – Xallas FC
Ponteceso SD – SD San Lorenzo
CD Baio – CF Mazaricos
Clasificación : PREME AQUÍ
.
-Foto Xallas : Bruno Prego
-Foto Soneira : Lolita Campaña
-Foto Sp Zas : Prensa Sporting Zas
-Texto : Xosé Búa “Pirata”