LIGA DA COSTA
21ª Xornada
Domingo 08/03/2026
UD Monte Louro 1-2 Outes FC
SCD Malpica 1-1 UD Corcubión
Cabana SD 5-1 Sporting Zas
CF Porteño 7-2 CF Corme
Ponteceso SD 5-0 CD Muros
CF Mazaricos 6-0 Soneira SD
SD San Lorenzo 0-0 Xallas FC
CD Baio 0-1 SD Sofán ” B”
As crónicas están abertas para ir incorporando os comentarios que nos cheguen dos adestradores, xa que nós non pedimos a ninguén, o que queira pode mandalos e coma sempre son postos ao completo e baixo a sua responsabilidade.
CRÓNICAS
A 21ª xornada da Liga da Costa deixou unha xornada con moitos goles (31 tantos en total), e con poucos cambios na zona máis alta da clasificación, xa que os tres primeiros clasificados non pasaron do empate ou da derrota.
O líder SD San Lorenzo empatou sen goles ante o Xallas FC, no duelo da xornada, mentres que o CD Baio, segundo clasificado, caía sorpresivamente pola mínima na casa ante o SD Sofán B.
Quen si aproveitou a xornada foi o CF Porteño, que asinou a goleada da xornada ante o Corme (7-2), mantendo o pulso polos postos de promoción. Tamén destacou o Ponteceso, que goleou ao Muros, e a gran sorpresa deuna o Mazaricos, xa non por derrotar ante ao Soneira, senón de por como o fixo, (6-0).
Pola súa banda, o Outes levou os tres puntos do campo do Monte Louro nun partido resolto na primeira metade, mentres que Malpica e Corcubión repartiron puntos nun encontro moi igualado. O Cabana, pola súa parte, impúxose con claridade ao Sporting Zas nun duelo importante na zona baixa.
A falta de 9 xornadas para o final, a loita polo ascenso directo e polos dous postos de promoción segue totalmente aberta, así como polo descenso direto e por escapar dos postos de posibles arrastres vendo como lles vai aos equipos costeiros na Primeira Futgal.
CRÓNICAS
UD Monte Louro 1-2 Outes FC
Partido moi movido na primeira metade no que o Outes foi quen de golpear primeiro e acabar levando tres puntos importantes.
Os visitantes adiantáronse cedo no marcador cando Hugo marcou no minuto 7. O Monte Louro reaccionou rápido e Chano puxo o empate no minuto 15, pero pouco despois Martín anotou o que acabaría sendo o gol definitivo no minuto 25. A partir de aí o marcador xa non se movería.
Goles: 0-1, Hugo (7´); 1-1, Chano (15´); 1-2, Martín (25´).
SCD Malpica 1-1 UD Corcubión
Empate nun partido moi igualado no que os dous equipos tiveron poucas ocasións claras de gol.
O adestrador do Corcubión, Isidro Trillo, explicaba así o encontro:
“Partido moi igualado. Na primeira parte estivemos un pouco mellor nós, aínda que con case ningunha ocasión clara. No minuto 35 Iago marcou un golazo de falta e así acabou a primeira parte. Na segunda, nada máis comezar expulsaron ao dianteiro do Malpica e aí, cando tiñamos que controlar o partido, fixemos todo ao revés. No minuto 60 marcarían de chilena o empate e, desde aí ata o final, cero ocasións para uns e outros. Foi un mal partido noso, sobre todo na segunda parte, cun empate xusto”.
Goles: 0-1, Iago Lema (35´); 1-1, Luís (60´).
Cabana SD 5-1 Sporting Zas
O Cabana acabou levando un triunfo amplo nun encontro que se rompeu totalmente na segunda metade.
O adestrador do Zas, Rubén Forján, analizaba así o partido:
“O Sporting Zas afrontaba en Cabana un partido clave na loita por saír da zona baixa da clasificación, nun encontro no que chegaba moi condicionado polas numerosas baixas.
A primeira metade estivo marcada por moi pouco xogo no medio campo e por un guión de moita disputa, transicións e balóns longos buscando as costas das defensas. Nese contexto foi o Cabana quen xerou as ocasións máis claras para abrir o marcador, con dúas oportunidades moi perigosas que non foi quen de materializar. A acción máis significativa do primeiro tempo chegou nunha falta lateral na que Guille saíu a interceptar e acabou chocando cun xogador rival, quedando tocado do xeonllo e limitado para desprazarse o resto do encontro. A pesar diso chegouse ao descanso co 0-0.
Tralo paso polos vestiarios o partido rompeu nos primeiros minutos. Unha falta e un córner, ambos ben executados e mellor rematados polo Cabana, puxeron un duro 2-0 no marcador. Nese momento Guille viuse obrigado a pedir o cambio ao non poder continuar polas molestias, entrando Pablo Fuentes para ocupar a portería, que nada máis entrar recibiría outro tanto.
O Zas tentou reaccionar e estirouse algo máis, especialmente con Darío e Redondo, que lograron recurtar distancias e mesmo estiveron preto de meterse de cheo no partido con algunha ocasión máis. Porén, o Cabana volveu golpear nos momentos clave e, con maior frescura e acerto no tramo final, anotou dous tantos máis que deixaron o encontro nunha goleada”.
Goles: 1-0, Noé (50´); 2-0, David (53´); 3-0, Parga (57´); 3-1, Redondo (80´); 4-1, Simón (92´); 5-1, Nando (94´).
CF Porteño 7-2 CF Corme
Festival ofensivo do Porteño, que deixou o partido practicamente resolto nos primeiros minutos cun arranque fulgurante.
Os locais xa gañaban 3-0 antes do cuarto de hora con goles de Bruno, Alfredo e José “Pejo”. Na segunda metade continuou o dominio local, con Bruno como gran protagonista anotando catro goles.
O Corme conseguiu recurtar distancias en dúas ocasións por medio de Israel, pero o Porteño seguiu ampliando a vantaxe ata o 7-2 final.
Goles: 1-0, Bruno (2´); 2-0, Alfredo (9´); 3-0, José “Pejo” (13´); 4-0, Bruno (52´); 5-0, Bruno (57´); 5-1, Israel (64´); 6-1, Bruno (70´); 6-2, Israel (86´); 7-2, David Carrabete (89´).
Ponteceso SD 5-0 CD Muros
Triunfo contundente do Ponteceso, que resolveu o partido entre o final da primeira metade e o inicio da segunda.
Eloy abriu o marcador no minuto 42 e, nada máis comezar a segunda parte, Alberto Recarey ampliou a vantaxe. A partir de aí o Ponteceso dominou con claridade e chegaron tres goles máis para completar a goleada.
Goles: 1-0, Eloy (42´); 2-0, Alberto Recarey (48´); 3-0, David Lema (57´); 4-0, Mendieta (70´); 5-0, Teo (80´).
CF Mazaricos 6-0 Soneira SD
Gran triunfo do Mazaricos, que asinou unha das goleadas da xornada e sumou tres puntos importantes.
O marcador abriuse no minuto 32 cun tanto de Borja. Na segunda metade os locais foron moi superiores e ampliaron a vantaxe con goles de Álvaro, de novo Borja, Raúl, Chumiko e Molinos.
Goles: 1-0, Borja (32´); 2-0, Álvaro (50´); 3-0, Borja (52´); 4-0, Raúl (66´); 5-0, Chumiko (76´); 6-0, Molinos (85´).
SD San Lorenzo 0-0 Xallas FC
Empate sen goles entre dous dos equipos da zona alta nun encontro moi disputado no que as defensas se impuxeron aos ataques.
O comentario do adestrador do Xallas, Bruno Prego :
“Empate sen goles nun encontro moi esixente ante o líder da competición, no que o equipo competiu a un gran nivel durante os 90 minutos.
O partido comezou con moita intensidade e xa no minuto 5 tivemos a primeira ocasión moi clara do encontro, tras unha acción de xogo directo que nos permitiu plantarnos preto da portería rival, aínda que finalmente non fomos quen de materializala.
Durante o resto do partido o guión mantívose similar, cun encontro moi disputado, no que apostamos principalmente polo xogo directo para intentar facer dano ao líder, buscando segundas xogadas e situacións de profundidade. O equipo estivo moi serio a nivel defensivo, traballando con moita orde e compromiso para neutralizar as fortalezas do rival.
Co paso dos minutos o partido fíxose cada vez máis pechado, con poucas ocasións claras para ambos conxuntos. A intensidade e o traballo colectivo foron claves para manter o resultado.
Xa na última xogada do encontro tivemos outra ocasión moi clara para levar os tres puntos, pero non fomos capaces de finalizar a acción como nos gustaría.
En definitiva, un punto de moito mérito ante o líder, nun partido de moita esixencia no que o equipo mostrou carácter, traballo e competitividade. Se seguimos nesta liña, estaremos máis preto de conseguir os nosos obxectivos.”
Goles : 0-0
CD Baio 0-1 SD Sofán B
Sorpresa en Baio coa vitoria do Sofán B, que levou os tres puntos grazas a un gol ao bordo do descanso e que lle vale os sofanistas para abrir fenda co descenso.
Ismael Ramos marcou no minuto 44 o tanto que acabou decidindo o encontro, deixando ao Baio sen premio nun partido moi igualado.
Goles: 0-1, Ismael Ramos (44´).
Clasificación
1º SD San Lorenzo : 41
2º CD Baio : 36
3º Xallas FC : 35
4º CF Porteño : 34
5º SCD Malpica : 33
6º Outes FC : 32
7º Soneira SD : 29
8º UD Corcubión : 28
9º Ponteceso SD : 27
10º Cabana SD : 26
11º CF Corme : 26
12º SD Sofán B : 24
13º CD Muros : 22
14º Sporting Zas : 18
15º UD Monte Louro : 18
16º CF Mazaricos : 18
.
LIGA DA COSTA
22ª Xornada
Domingo 15/03/2026
Xallas FC – CF Mazaricos, 14/03 ás 18:00
UD Corcubión –Outes FC
Sporting Zas – SCD Malpica
CF Corme – Cabana SD
CD Muros – CF Porteño
SD Sofán ” B” – Ponteceso SD
SD San Lorenzo – UD Monte Louro, ás 16:30
Soneira SD – CD Baio, ás 16:45
(Os horarios non son firmes)
.
.
-Fotos Sp Zas : Prensa do club
-Texto : Xosé Búa “Pirata”
-Comentarios : Propios e integros dos adestradores