Crónica da 1ª xornada da Preferente Norte
A Preferente Norte 2025-26 botou a andar cunha primeira xornada chea de emoción e con resultados moi igualados, na que os equipos costeiros deixaron xa a súa pegada.
Sofán, triunfo de peso en Betanzos
O SD Sofán estreouse cunha vitoria de prestixio no sempre complicado García Hermanos fronte ao Betanzos CF (0-1). O conxunto vermello mantivo o tipo durante todo o encontro e soubo agardar o seu momento. O gol da vitoria chegou no minuto 78, obra de Cortés, que bateu ao gardameta local e fixo inútil o esforzo dos brigantinos por rescatar un punto.
Un triunfo importante, que coloca ao Sofán con tres puntos de ouro e que confirma ao cadro carballés como un dos serios aspirantes a pelexar polos postos altos.
Dumbría, empate con sabor agridoce
No Conco, o CF Dumbría asinou un 2-2 diante da SD Dubra, nun encontro cheo de alternativas e emoción ata o último suspiro.
Os visitantes adiantáronse no minuto 68 por medio de Cea, pero os dumbrieses reaccionaron con forza: primeiro empatou Aarón no 83’, e logo Xabi Castro culminou a remontada no 89’, facendo estourar de ledicia ás bancadas. Porén, cando xa se saboreaban os tres puntos, no 92 apareceu Borja para establecer o definitivo empate.
Reparto de puntos que deixa ao Dumbría cun sabor agridoce: pola reacción e pola capacidade ofensiva, pero tamén coa sensación de ter deixado escapar unha vitoria case feita.
O resto da xornada
-
Negreira 1-1 Lalín
-
Cultural Maniños 1-3 Ordes
-
Puebla 2-1 Ribeira
-
Burela 1-1 Sigüeiro
-
Val de Narón 0-1 San Tirso
-
Victoria 1-0 Pol
-
Miño 1-1 Paiosaco
A igualdade foi a tónica xeral desta primeira data, con só tres equipos capaces de gañar fóra da casa (Ordes, San Tirso e Sofán).
Clasificación inicial
Con estes resultados, a táboa queda moi apertada, con ata seis equipos compartindo liderado con 3 puntos. Entre eles, o SD Sofán, que comeza con bo pé a súa aventura. O CF Dumbría, cun punto, mantén o pulso e deixa boas sensacións de cara ás próximas citas.
Previa da 2ª xornada
A liga non dá tregua e tras unha primeira xornada igualada, chega unha segunda cita chea de emocións para os nosos equipos costeiros, coincidindo ademais cunha data moi sinalada: o Domingo da Barca, (14/09/2025).
SD Sofán – SD Negreira
Campo do Carral (Sofán)
Domingo 14 de setembro – 17:00 horas
O Sofán debuta na casa despois do gran triunfo en Betanzos e faino contra un rival directo na loita polo ascenso: o SD Negreira. O Carral estrearase esta tempada cun duelo de altura, entre dous equipos que aspiran a estar no grupo de cabeza.
O conxunto sofaneiro chega lanzado, con Cortés como heroe do primeiro partido e coa confianza polas nubes. O Negreira, que empatou co Lalín na xornada inaugural, chega disposto a amargar a festa, polo que se agarda un partido intenso, de moita loita e onde a afección local pode ser determinante.
San Tirso SD – CF Dumbría
O Monte (San Tirso)
Domingo 14 de setembro – 17:00 horas
O CF Dumbría afronta a súa primeira saída da tempada nun día moi especial para toda a Costa da Morte, o Domingo da Barca. Logo do empate con sabor agridoce ante o Dubra, os de O Conco viaxan a terras do Tambre para medirse a un San Tirso que comezou con forza, vencendo ao Val de Narón.
O encontro preséntase como unha proba de carácter para os dumbrieses, que deberán mostrar a mesma capacidade de reacción que amosaron na primeira xornada, pero sen repetir os erros que custaron dous puntos no desconto. O apoio da parroquia costeira, mesmo en día de festa grande en Muxía, será clave para buscar un resultado positivo.
-Foto e texto : Xosé Búa “Pirata”