O Depor afronta este Domingo unha auténtica proba de nivel no estadio de “El Alcoraz” (16:15 horas), nun duelo clave tanto para os deportivistas como para a SD Huesca. Mentres os aragoneses loitan por fuxir dos postos de descenso, os nosos queren manterse firmes na pelexa polo ascenso á Primeira División.
O choque, como toda esta xornada nas duas categorías profesionais, será en versión “Retro”, os equipos xogarán cunha camiseta do pasado, no caso do Depor a que usou de segunda equipación do 1987 ó 1990, e o balón tamén será desa época.
Na previa do encontro, o técnico deportivista, Antonio Hidalgo, deixou clara a esixencia do choque: «Teño claro que é o momento de seguir competindo e estar moi en alerta en cada partido». Ademais, advertiu sobre o rival: «Sabendo a dificultade do partido do domingo, eles van ir con todo e ao límite. Hai que poñer atención, alerta e humildade».
O adestrador regresará a unha cidade especial para el, tras a súa etapa no conxunto altoaragonés: «Moi contento de volver a Huesca, compartir con xente á que lle estou moi agradecido, con moita ambición por competir». Iso si, deixou claro que o contexto mudou: «Vai ser unha historia diferente ao de antes, cun rival que mellorou moitísimo».
Sobre o momento do equipo, Hidalgo destacou o progreso das últimas semanas: «Nos últimos partidos demos un paso adiante. Somos un equipo moito máis equilibrado, pero iso xa non serve por si só. Hai que seguir empurrando. Todos nos xogamos algo». Nesa liña, insistiu na importancia da regularidade: «Isto vai ser moi longo, cada 3 puntos son importantísimos. Hai que estar vivos ata o último segundo».
A igualdade na categoría é outro dos factores clave: «A explicación da puntuación é que a parte de arriba suma moito e a de abaixo non tanto. As posicións dos 6 primeiros vanse encarecer máis que outros anos». Por iso, o obxectivo segue sendo claro pero sen perder a perspectiva: «O obxectivo sempre foi loitar por estar entre os 6 primeiros. Hai que ir semana a semana, é o que nos ten que empurrar desde a humildade».
No plano mental, o técnico foi contundente: «Ten moita importancia. É ir afrontando as cousas segundo van vindo. Poden chegar momentos de dificultade nesa humildade. Hai que vivir en alerta». Un aspecto fundamental nun partido no que tamén haberá que «controlar o vaivén de emocións» e estar preparados «para todo» ante o ímpetu do rival.
Sobre o conxunto oscense e o seu técnico, José Luis Oltra, Hidalgo amosou respecto: «Coñezo a José Luis. Están indo altos a presionar. Son momentos difíciles para os equipos de abaixo. Todo o meu respecto». Ademais, advertiu da dureza destes rivais: «Estiven dous anos en Huesca e sei como van competir».
En canto á situación do persoal, confirmou que hai poucos problemas: «Todo o mundo con normalidade, agás David», aínda que recoñeceu que «a final de tempada hai molestias de todo tipo», destacando o bo traballo do grupo e do corpo técnico.
Tamén tivo palabras para nomes propios como Yeremay: «É unha lesión que hai que sufrila moito, hai que axudalo e apoialo pouco a pouco», ou Zakaria, de quen salientou «unha alma competitiva incrible» e a súa profesionalidade.
En definitiva, o duelo no Alcoraz preséntase como unha auténtica «proba de verdade» para un Dépor que quere seguir dando pasos cara ao ascenso, mantendo a identidade que o levou ata aquí: competir, estar en alerta e non perder nunca a humildade.
.
-Fotomontaxe e texto : Xosé Búa “Pirata”
-Vídeo : RC Deportivo