Inés Rey García alcaldesa da Coruña.

DECLARACIÓN INSTITUCIONAL DO CONCELLO DA CORUÑA O “CASO FUENLABRADA”

Diante dos feitos ocorridos na Coruña durante o mes de xullo e agosto que, coñecidos como Caso Fuenlabrada, provocaron graves prexuízos sanitarios, económicos e deportivos á cidade, o Pleno do Concello da Coruña por unanimidade quere emitir a seguinte

Declaración Institucional:

 1- Desde principios do presente ano de 2020, a cidade da Coruña vén realizando un enorme esforzo para conter dentro do posible as terribles consecuencias da pandemia do COVID-19. As importantes restricións, como o longo confinamento, atoparon unha resposta exemplar por parte da cidadanía, que con moi escasas excepcións continúa a día de hoxe a seguir escrupulosamente as medidas que as distintas administración tivemos que tomar para frear o virus. Este sacrificio supuxo e supón un enorme reto diario que atinxe a todas e todos. Polo tanto, ningunha institución ou sector, por moi importante que sexa ou que se sinta, está por riba destas normas, dispostas para coidar do máis relevante que temos: a saúde pública.

2- O pasado luns 20 de xullo, o Club de Fútbol Fuenlabrada, co aval da Liga de Fútbol Profesional, viaxou á Coruña e se instalou na cidade a pesar de que desde dous días antes sabía da existencia dun brote de Covid-19 no equipo, malia o cal se desprazaron en avión e autobús e acudiron e se moveron polas instalacións dun céntrico hotel. Finalmente, ao descubrirse a gran dimensión do brote, a expedición tivo que ficar en corentena, causándolle polo efecto mediático un enorme prexuízo á actividade económica da cidade, así como impedindo, tras a inxusta decisión da Liga de disputar o resto da xornada, que o Real Club Deportivo puidese defender en igualdade de condicións a súa permanencia en Segunda división. Polo tanto, nin o Fuelanbrada nin a Liga actuaron como indican as normas, causando un forte dano sanitario, económico e deportivo á Coruña.

3- Ante a gravidade dos feitos, o Concello da Coruña reaccionou con rapidez, tanto no plano da denuncia pública como no legal, poñendo a disposición da Fiscalía a información existente, da que se derivou a apertura de dilixencias nun Xulgado de Instrución da cidade. Tamén a Xunta de Galicia estudou o ocorrido, ante o que xa emitiu, en función das súas competencias, unha proposta de forte sanción para Fuenlabrada e Liga de Fútbol Profesional. A pesar destas evidencias, tanto os causantes do problema como algúns dos seus aliados intentaron reverter a situación mediante inxustificables ataques ás e aos nosos representantes democráticos, así como a boa parte da cidade e algún dos seus principais símbolos, como foi o caso de Álex Bergantiños, capitán do Real Club Deportivo vítima dunha burda manipulación que en ningún caso ensombrece a súa dignidade, que unánimemente recoñecemos hoxe neste Pleno.

4- O principal instigador e responsable destes graves acontecementos foi o presidente da Liga de Fútbol Profesional, Javier Tebas Medrano, que en todo momento demostrou un absoluto desprezo tanto polas medidas a prol da Saúde Pública como pola cidade da Coruña, as súas autoridades e, especialmente, as súas xentes. A actitude e as actuacións de Javier Tebas representan exactamente os valores contrarios aos que compartimos na Coruña, urbe de talante aberto, comunitario, solidario e vangardista. Desde o Pleno do Concello declaramos unha vez máis que nas nosas rúas, persoas como Javier Tebas non teñen cabida, agás no que respecta a responder polo seu comportante ante a Xustiza.

5- Por desgraza, a actitude da Javier Tebas atopou un socio inesperado. En contra da exemplaridade obrigada do servizo público e mesmo das súas propias afirmacións un 22 de xullo, o Consejo Superior de Deportes dimitiu das súas responsabilidades coa saúde pública e o xusto funcionamento das competicións e deixou completamente impunes as irregularidades cometidas polo Fuenlabrada e pola Liga de Fútbol Profesional, ademais de renunciar a calquer tipo de reparación ás vítimas do ocorrido: o Real Club Deportivo e a nosa cidade. Ante esta grave decisión, o Pleno do Concello da Coruña esixe unha rectificación pública e inmediata ao CSD na que, entre outras cousas, se acepte unha Liga de Segunda División de 24 equipos e se inhabilite a Javier Tebas para o seu cargo actual. En caso de non proceder así, a actual máxima responsable do Consejo Superior de Deportes, Doña Irene Lozano, sería cómplice do atropelo a toda unha cidade, polo que debería dimitir inmediatamente do seu cargo.

6- Por último, o Pleno do Concello reafirma o seu compromiso coa saúde pública e agradece publicamente o comportamento da cidadania na grave crise que atravesamos. Así mesmo, amosa o seu recoñecemento a todas as persoas e institucións que apoiaron á cidade durante os acontecementos aos que nos referimos nesta Declaración, así como agradece que a Real Federación Española de Fútbol si cumprise coas súas obrigas institucionais. Así mesmo, este Pleno lanza de novo un berro de apoio a un dos grandes símbolos e motores económicos da cidade, o Real Club Deportivo, que nestes complicados intres seguirá tendo aquí, en María Pita, un aliado, así como nos milleiros de coruñeses e coruñesas que volverán dar un exemplo de amor ao branquiazul na tempada que está a piques de comezar. A Coruña é unha cidade orgullosa e con valores. Seguirémolo demostrando.

“EN MAREA” PIDE DECRARAR A TEBAS “PERSOA NON GRATA”

A Marea Atlántica presenta unha moción para declarar a Javier Tebas persoa non grata na Coruña

O “PP”  PRESENTOU UNHA MOCIÓN PARA DEBATIR O “CASO FUENLABRADA”

O Partido Popular lembra que presentou unha moción que se debaterá no Pleno do próximo día 10 para lograr a unanimidade da Corporación coruñesa na esixencia de dimisión de Irene Lozano como presidenta do CSD. Lozano tiña a responsabilidade política de solucionar o esperpento vivido durante este mes e medio. A solución tiña que ser política e a solución foi un fracaso político. Lozano e o PSOE terán que explicar por que en xullo culpaban á liga e ao Fuenlabrada e en agosto branqueáronos».

-Foto : Google Images

-Texto : Concello da Coruña/A Marea Atlántica/La Voz de Galicia