3ª DA COSTA 27ª Xda) : “O Pereiriña e o Cerqueda toman certa ventaxa na loita polos 3 postos que quedan de promoción con 4 equipos máis na loita”.

A 27ª xornada da 3ª da Costa deixou xa o pano case botado na cabeza e moitas cousas aclaradas… pero tamén unha pelexa fermosísima polo que queda por decidir.

Por riba, pouco suspense: o SD Oza fáltalle un punto para facerse co título…Nova goleada (4-0 ao Laxe) para marchar ata os 69 puntos e confirmar que desde que se desprendeu do Coristanco na loita tomou o dominio absoluto sen discusión.

E tampouco hai dúbidas co acompañante: o SD Coristanco, que empatou en Lira (1-1), suma 61 puntos xa co ascenso á Liga da Costa certificado a semana pasada. 

O Cee cumpre… e mira de esguello

O UC Cee fixo os deberes nun partido tolo ante o Nantón (4-2) e xa ten amarrada a promoción. Terceiros con 53 puntos, están nun limbo: sen opción de ascenso directo pero tamén sen perigo por detrás. Iso si, aínda poden ser xuíces de quen entra na promoción pois acaban a liga ante o Seaia… e teñen descanso pendente.

A promoción: aquí está a guerra

Quedan 3 xornadas e hai 3 prazas en xogo. E aquí si que hai lume. O gran gañador da xornada foi o Atlético Pereiriña, que venceu con solvencia en Buño (0-2), rival direto. Soben a 44 puntos e quedan cun pé e medio na promoción: cunha vitoria máis, practicamente dentro. Ademais, collen vantaxe nun momento clave.

Tamén deu un golpe importante o UD Cerqueda, vencendo ante o Volantes de Baño (2-3). Colócanse con 40 puntos e, agora mesmo, dentro da promoción. Pero ollo: son os únicos dos aspirantes que teñen que descansar unha das tres xornadas finais. Un factor que pode pesar… e moito.

O SD Laxe, que caeu goleado en Oza (4-0), queda con 37 puntos e perde unha oportunidade de ouro para asentarse. Segue dentro, si, pero xa nota o alento dos que veñen por detrás. Que de todos modos temporadón para os laxenses que foron colistas gran parte da tempada.

A zona media que quere ser alta

E por aí aparece o grupo dos “tapados”:

• O Sporting Seaia, derrotado en Brens (1-0), queda tamén con 37 puntos. Freada importante.
• O CD Baiñas, que goleou ao Camelle (4-1), métese de cheo na pelexa con 37 puntos.
• O SCD Buño, pese á derrota, queda con 35 e aínda con opcións.

Tres equipos nun pano, esperando un tropezo dos de arriba.

E mención especial para o Inter de Brens, que sumou a súa terceira vitoria da tempada ante o Seaia (1-0). Non lles dá para saír do fondo, pero si para darse un golpe de moral, o derrotar a un equipo que se xoagaba moito.

O que vén: calculadoras, descansos… e nervos

Quedan 3 finais e con atencións a outros campos minuto a minuto. E aquí, como dirían en Muxía…ai mimá!!!.