Crónica xeral | 3ª da Costa – 19ª xornada
A 19ª xornada da 3ª da Costa serviu para reforzar o dominio dos dous grandes favoritos, axitar a pelexa polos postos de promoción e confirmar que a liga entra nun tramo decisivo no que cada punto pode marcar o futuro dos equipos situados entre o terceiro e o sexto posto.
Na cabeza da clasificación, o SD Oza segue xogando noutra liga. A goleada por 9-1 fronte ao CF Muxía B reafirma o liderado dun equipo que acumula números demoledores: 16 vitorias en 18 partidos, 73 goles a favor e só 13 en contra. Oza mantén unha vantaxe sólida e cada xornada que pasa semella máis preto do ascenso directo.
Non lle perde o paso o SD Coristanco, que superou con autoridade ao Sporting Seaia CF (0-2) e continúa segundo, tamén en postos de ascenso directo. Cos seus 44 puntos e un partido menos, o Coristanco mantense como o principal rival do Oza, deixando claro que o duelo polo liderado segue aberto, aínda que con marxe para os líderes.
Por detrás, a loita polos postos de promoción (do 3º ao 6º) está máis quente ca nunca. A UC Cee deu un paso firme ao vencer en Buño, consolidando a terceira praza e afianzándose como o equipo máis regular dese segundo bloque. O Atlético Pereiriña FC tamén saíu reforzado tras un encontro tolo ante a UD Cerqueda, un triunfo que lle permite seguir cuarto e metido de cheo na pelexa polo ascenso.
Moi pendente desa zona está o SD Laxe, que continúa escalando tras superar ao CD Nantón. Os laxenses sitúanse quintos, nunha posición privilexiada pero sen marxe para relaxarse, xa que o sexto clasificado, o Sporting Seaia CF, segue a tiro malia a derrota desta xornada, pero sempre tendo presente que fai pouco tempo non creería que o Laxe estaría onde está agora mesmo tras pasar meses no abismo.
Na zona media, xornada positiva para o CD Baíñas, que sumou tres puntos importantes fronte ao CF Lira, mentres que o Volantes de Baño FC protagonizou outra das goleadas da xornada ante o Inter de Brens, achegándose aos postos tranquilos da táboa.
Na parte baixa, sen a presión dos descensos (que non existen nesta categoría), os equipos seguen competindo coa vista posta en rematar a tempada do xeito máis digno posible. O SD Camelle, que descansou nesta xornada, mantén a súa posición.
Coa clasificación xa moi definida nos extremos, a emoción céntrase agora primeiro en quen será o campión e logo na batalla polo terceiro, cuarto, quinto e sexto posto. A falta de poucas xornadas, cada enfrontamento directo e cada tropezo poden ser decisivos nunha 3ª da Costa que, lonxe de perder interese, gaña intensidade semana tras semana.
.
Clasificación
1º SD Oza : 48
2º SD Coristanco : 44
3º UC Cee : 35
4º Atlético Pereiriña FC : 32
5º SD Laxe : 29
6º Sporting Seaia CF : 28
7º UD Cerqueda : 26
8º CD Baíñas : 26
9º SCD Buño : 25
10º Volantes de Baño FC : 23
11º SD Camelle : 19
12º CD Nantón : 15
13º CF Lira : 14
14º CF Muxía B : 9
15º Inter de Brens : 7
.
3ª DA COSTA
20ª xornada
Domingo 01/03/2026
CF Lira – Inter de Brens
CF Muxía “B” – CD Baiñas
UC Cee – SD Oza
UD Cerqueda – SCD Buño
SD Coristanco – SD Camelle
Sporting Seaia CF – Volantes de Baño FC
CD Nantón – Atlético Pereiriña FC, ás 17:00
Descansa : SD Laxe
.
-Foto e texto : Xosé Búa “Pirata”